Jumat, 09 November 2012

Lengenda Batu Antang - Tamanggung Amai Rawang


LEGENDA BATU ANTANG dan TAMANGGUNG AMAI RAWANG

Hung katika huran intu lewu Upun Batu inyewut kea lewu Tumbang Manange, (wayah tuh tame Kecamatan Tewah, Kabupaten Gunung Mas, Provinsi Kalimantan Tengah), Metuh wayah getem are oloh lewu t
ulak malan, baya pire-pire biti bewei je magun atun hung lewu te, tuntang tapare kawan bawi bewei. Bara kare kawan bawi lewu je melai te atun kea ije bawi basewut yete je nggare “Nyai Inai Rawang”. sawan “Toendan” je inggalar oloh kea “Tamanggung Amai Rawang”,

Metuh oloh are tulak malan nah salenga dumah “Asang Kayau” (tetek kulok) bara hulu batang danum je iyewut kea oloh ot, manyarang lewu Upun Batu, metuh rahat kawan bawi mampukan melai talian saran batang danum Kahayan. Asang Kayau te are mampatei oloh lewu, are kea je bahimang, hadari mawat arepe.


Metuh Tamanggung Amai Rawang ewen ndue paharie Tewek (andi bara Tamanggung Amai Rawang) buli bara tana, ewen ndue tarewen manampayah narai je jari mawi oloh lewu, are matei. Hemben te kea Tamanggung Amai Rawang manyuhu ije hatue je inggare “Singa Puai” tulak akan tana mantehau tambakas ewen je inggare “Ucek”, tuntang mimbit oloh are uka tau mambaleh bunu.


Sana sampai intu tana, Singa Puai tarewen, tagal Asang Kayau te jari mawi oloh melai tana. Are kea oloh matei gawi Asang Kayau te. Dia baya mawi bewei, Asang Kayau te malihi peteh, basa ewen akan haluli mangayau huang kauju andau harian. Kuan peteh te : “Hapus oloh Upun Batu tau salamat amun ewen manyarah kare panataue, tuntang manjadi jipen Asang Kayau te, amun dia ewen kareh uras impatei.” Limbah te Asang Kayau malihi “Sampalak” kilau kata (tanda) eka Asang Kayau kareh manyarang.


Tamanggung Amai Rawang dengan pire-pire biti oloh lewu je magun belum, muduk manure, manyarenan kapehen atei tuntang kapusang tagal taluh ije manaripi ewen lewu Upun Batu. Handak mamaleh bunu, jatun kaabas, tagal je batisa isut biti bewei.

Kajaria ewen, Manajah Antang (mantehau Antang Patahu, yete roh-roh tatu hiang je mahaga lewu), balaku pansanan tuntang pandohop.

Huang upacara Manajah Antang te, ewen mandinu pansanan bara Antang Patahu, uka Tamanggung Amai Rawang mampendeng ije kuta (benteng) intu hunjun bukit batu je tandipah lewu Upun Batu, Tumbang Manange. Amun Asang Kayau dumah bara hila pambelep, maka ewen musti hadari, jete kata ewen akan kalah, tapi amun Asang Kayau te dumah bara hila pambelum, rimae ewen akan manang.


Tuntang peteh Antang Patahu akan Tamanggung Amai Rawang, ie dia tau manyilak Mandau hapa manaharep musuh. Ie baya muduk hunjun garantung, mananture narai kajaria, tagal Antang Patahu kabuat je manaharep Asang Kayau te.


Puna tutu, andau je jari inukas Asang Kayau nah, tulus manjadi. Kawan Asang Kayau dumah handak manyarang lewu Upun Batu bara hila pambelom. Puna basiak ampin baun matan ewen.


Tapi, sahelu ewen manaharep Tamanggung Amai Rawang, Asang Kayau te eleh dip-dap manjatu, awi Antang Patahu. Kawan Asang Kayau balaku ampun, ewen dia ulih manaharep Antang Patahu, balalu ewen Asang Kayau manyarah arep ewen manjadi jipen Tamanggung Amai Rawang.


Limbah kejadian Asang Kayau jari sanai, Lewu Upun Batu (Tumbang Manange) haluli aman, sanang landang kilau sulake.


Antang Patahu te kilau ije tamunan Hatalla ngambu je mandohop masi oloh ije bujur buah dia basala. Ie tau dumah amun oloh mantehau mahalau upacara Manajah Antang.


Intu saran sungei Kahayan
te atun Batu Suli (awi tampae kilau bua suli) hung saran Puruk Amai Rawang. Intu Puruk Amai Rawang te Tamanggung Amai Rawang Manajah Antang tege kea hete ije batu, je inggare Batu Antang (batu tingkes). Tege ije rombak intu Batu Antang te, manumun kapercaya oloh lewu, awang je ulih tame rumbak kurik palus balua akan silae, ie baumur panjang, batuah marajaki. Hung hete kea tege kubur Tamanggung Amai Rawang.

Wayah tuh, Batu Suli tuntang kea Puruk Amai Rawang te akan ije Obyek Wisata, ayun Kecamatan Tewah, Kab. Gunung Mas, Kalimantan Tengah. Amun oloh samapai Tewah dia manalaih Batu Suli tuntang Puruk Amai Rawang rugi
tutu.

(sumber : /Isen Mulang Petehku/Kaskus.com : inyalin haluli dengan bahasa itah tuntang tege je indahangku isut).

3 komentar:

  1. Bahalap tutu ain bapa toh,kosa kata bahasa te mangat itah manyeneh ah pak,halus kosa kata,tuntang mangat marimae,tahi dia mambasa tuntang bapander ije tutu ain itah,amun wayah toh anak muda dia lalau bahalap ampin auh bahasa. Amun tau pak pendeta rekomendasikan sarita daerah ain itah toh akan pemerintah mangat inampa hung kesah anak sakula pelajaran muatan lokal pak,,semoga bapak maku manduhup melestarikan bahasa tuntang kebudayaan ayum tatu hiyang itah.
    Salam

    BalasHapus
  2. Bahalap tutu ain bapa toh,kosa kata bahasa te mangat itah manyeneh ah pak,halus kosa kata,tuntang mangat marimae,tahi dia mambasa tuntang bapander ije tutu ain itah,amun wayah toh anak muda dia lalau bahalap ampin auh bahasa. Amun tau pak pendeta rekomendasikan sarita daerah ain itah toh akan pemerintah mangat inampa hung kesah anak sakula pelajaran muatan lokal pak,,semoga bapak maku manduhup melestarikan bahasa tuntang kebudayaan ayum tatu hiyang itah.
    Salam

    BalasHapus
  3. Tarima kasih.... Tuhan mamberkat..

    BalasHapus